کـه‌ریم تـاقـانه

فێدێریکۆ گارسیا لۆرکا

وه‌رگێڕان: که‌ریم تاقانه‌

ئه‌نگوستیله خشپیلانه‌که‌م

که له زێڕ بوو

له ئاوێنه‌‌که‌دا بێ سه‌ر و شوێن.

(ئه‌وه‌ی من ده‌مهه‌وێ بیڵێم

ئه‌وه‌یه که

ئه‌نگوستیله‌ قه‌ت له‌ گۆڕێدا نه‌بوو)

له ئاوێنه‌کاندا

ئه‌وه‌ی بوونی نییه

بێ سه‌ر و شوێن ده‌بێ.

ئه‌نگوستیله خشپیلانه‌که‌ی من له زێڕ بوو

یا له خۆر یا له گوڵه مینا؟

چ ژنێک به دیاری پێی دام؟

پرسیار  ڕوو به‌ ڕووی ئاوێنه‌که‌م ده‌که‌مه‌وه‌.

ته‌نانه‌ت ... ئه‌گه‌ر... من

هیچ  ئاوێنه‌یه‌کیش شک نه‌به‌م!

بنوو.

مه‌ترسه له‌و نیگا عه‌وداڵه‌.

بنوو.

نه په‌پووله‌‌ و

نه وشه‌ و

نه ئه‌و ترووسکاییه لاوازه‌ی

به کونی کلیله‌که‌‌دا دێ

نا‌توانن زه‌فه‌رت پێ ببه‌ن.

بنوو.

ئه‌وه‌ی له‌ دڵی خۆمدا ده‌یبینم

له تۆشدا ده‌یبینم،

ئاوێنه‌که‌م.

باخێک که له‌وێدا ئه‌وین

چاوه‌ڕێم ده‌کا.

بخه‌وه‌ و ترست نه‌بێ،

به‌ڵام ڕا به

ئه‌و کاته‌ی دوایین ماچ

له سه‌ر لێوه‌کانم ده‌مرێ.

ئاده‌م و حه‌وا.

ماره‌که

ئاوێنه‌که‌ی کرده هه‌زار

پارچه‌وه‌،

سێوه‌که‌ش

به‌رد بوو.

ئه‌و ئه‌ستێره کۆنه‌‌

چاوه کز و تاریکه‌کانی ده‌نووقێنێ..

ئه‌و ئه‌ستێره‌ تازه‌یه

ده‌یهه‌وێ سێبه‌ر ڕه‌نگ بکا،

به ڕه‌نگی شین.

(له‌و لێڕه‌واری سنه‌وبه‌ره کوێستانییه‌دا

گۆڵ‌ئه‌ستێره ده‌دره‌وشێنه‌وه‌)